प्रेयसीने लग्नास नकार दिल्याने गांधलीच्या तरुणाने गळफास घेऊन संपवले जीवन

अमळनेर (प्रतिनिधी) अल्पवयात लग्न करून नंतर प्रेयसीने नकार दिल्याने नैराश्यातून तालुक्यातील गांधली येथील तरुणाने गळफास घेऊन आत्महत्या केल्याची घटना क्रीडा संकुलाच्या शेजारी डुबक्या मारोती रस्त्यावर सकाळी १२ वाजेच्या सुमारास घडली. याप्रकरणी पोलिसांत नोंद करण्यात आली आहे.

  याबाबत अधिक माहिती अशी की, गौरव रवींद्र बोरसे (वय २१, रा. गांधली) या तरुणाने ६ रोजी सकाळी १२ वाजेच्या सुमारास रस्त्यालगत झाडाला गळफास घेऊन आत्महत्या केली. घटनस्थळी सहाय्यक पोलिस निरीक्षक रवींद्र पिंगळे, पोलिस उपनिरीक्षक नामदेव बोरकर, हेडकॉन्स्टेबल विनोद भोई, हेडकॉन्स्टेबल मिलिंद बोरसे, विनोद संदानशिव यांनी भेट देऊन पंचनामा केला. गौरवचे शव विच्छेदनसाठी ग्रामीण रुग्णालयात नेले. चर्चेतून मिळालेली  माहिती अशी की वय पूर्ण झाल्यावर गौरवने त्याच्या प्रेयसीला आता आपण लग्न करू असे सांगितले असता तिने स्पष्ट नकार देऊन मी तुला विसरली असे सांगितल्याने त्यांचे वाद झाले. थोड्या वेळानंतर त्याने इन्स्ट्राग्रामवर व्हिडीओ टाकला आणि नंतर झाडाला गळफास घेतला. भूषण हेमराज सूर्यवंशी याने खबर दिल्यावरून अमळनेर पोलिस स्टेशनला अकस्मात मृत्यूची नोंद करण्यात आली आहे. तपास हेडकॉन्स्टेबल विनोद भोई करीत आहेत.

आई माझ्या जाण्याने रडू नको…

दरम्यान गौरवच्या मित्रांनी त्याने गळफास घेण्यापूर्वी इन्स्ट्राग्रामवर टाकलेला व्हिडीओ शोधून काढला असता गौरवने त्याच्या आईला विनवणी केली आहे की आई तू माझ्या जाण्यानंतर रडू नको, मी तुझी इच्छा पूर्ण करू शकलो नाही. माझे वडील माझ्यावर पैसे खर्च करायला नाही म्हणायचे. बाप्याला शिकव, मित्रांना आवाहन करताना त्याने सांगितले की मित्रांनो प्रेम करू नका. आपापल्या अभ्यासात लक्ष ठेवा, मी XYZ नावाच्या मुलीवर प्रेम केले. आम्ही अल्पवयीन असताना लग्न केले होते. तिने मला नकार दिला. ती विसरून गेली. माझे खरे प्रेम आहे. मी जीवन संपवत आहे. मी आई वडिलांना सोडून जायला नको, मी जी चूक करत आहे ती तुम्ही करू नका..असे त्याने व्हिडिओत म्हटले आहे.