१२ ज्योतिर्लिंगांच्या दर्शनासाठी तरुणाचा पुणे ते केदारनाथ सायकलीने खडतर प्रवास

अमळनेर (प्रतिनिधी) १२ ज्योतिर्लिंगांच्या दर्शनाची इच्छा असल्याने ऊन, वारा, पाऊस याचा विचार न करता पुण्याच्या एका तरुणाने पुणे ते केदारनाथ असा सायकल प्रवासाला सुरुवात केली आहे. तो अमळनेरात आदाखल झाला आहे.  तो पुढे अमळनेरहून ममलेश्वर, ओंकारेश्वर तेथून उज्जैन याठिकाणी दर्शन घेऊन दिल्ली मार्गे बद्रीनाथ आणि केदारनाथाचे दर्शन घेणार आहे.

याबाबत अधिक माहिती अशी की, किशोर रामराव एकणार (वय २५ रा. चिंचखेड ता. बार्शी टाकळी जि. अकोला) हा तरुण पुण्यात हॉटेल व्यवसाय करतो. सहा महिन्यांपूर्वी त्याची १२ ज्योतिर्लिंग करायची इच्छा झाली. त्याने २१ जुलै रोजी पुण्याहून सायकल प्रवासाला सुरुवात केली. एक योगा मॅट, कापडी तंबू, दोन चादरी, दोन ड्रेस एव्हढेच साहित्य घेऊन किशोर देहू, भीमाशंकर, त्र्यंबकेश्वर, सप्तशृंगी गडावर दर्शन घेऊन २९ जुलैला सायंकाळी अमळनेर पोहचला. भर पावसात भिजत किशोर दररोज ८ ते ९ तास ७० ते ८० किमी प्रवास करतो. रस्त्यात कुठे तरी मंदिर अथवा देवस्थानात आपला मुक्काम करतो. अमळनेर येथे आल्यावर त्याने मंगळदेवग्रह मंदिरात मुक्काम केला. तेथे त्याची राहण्याची, खाण्याची सोय करण्यात आली होती. अमळनेरहून तो ममलेश्वर, ओंकारेश्वर तेथून उज्जैन याठिकाणी दर्शन घेऊन दिल्ली मार्गे बद्रीनाथ आणि केदारनाथाचे दर्शन घेणार आहे. केदारानाथाचे मंदिर बंद होण्यापूर्वी किशोरला तेथे पोहचायचे आहे.