अमळनेर (प्रतिनिधी) उसनावारीच्या दिलेल्या पैशांतून शिल्लक राहिलेले १० हजार रुपये मागितल्याने दोघा भावांनी एकास मारहाण केल्याची घटना तालुक्यातील झाडी येथे घडली. याप्रकरणी मारवड पोलिस ठाण्यात गुन्हा दाखल करण्यात आला आहे.
याबाबत पोलिसांनी दिलेली माहिती अशी,  तालुक्यातील झाडी येथील विनोद लोटन पाटील यांनी गावातील प्रकाश अर्जुन पाटील यांना ९० हजार रुपये त्यांचा भाऊ अशोक पाटील यांच्या समक्ष उसनवारीने दिले होते. पैसे उसनवार असे पर्यंत प्रकाश पाटील यांचे शेत विनोद पाटील यांना कसण्यासाठी दिले होते. त्यानंतर प्रकाश पाटील यांनी ८० हजार रुपये परत केल्याने त्यांचे शेत त्यांच्या ताब्यात दिले. त्यामुळे आठ दिवसापूर्वी राहिलेले दहा हजार रुपयांची मागणी केली असता प्रकाश पाटील यांनी तुझे माझ्याकडे काहीच पैसे बाकी नाही, यापुढे माझ्याकडे पैसे मागू नको असे सांगितले. त्यानंतर दि. २६ रोजी दुपारी २:३० वाजता विनोद पाटील घरी असताना सागर प्रकाश पाटील व बापूजी अशोक पाटील हे दोघे घरी आले व पैसे का मागितले म्हणून मारहाण केली. याप्रकरणी दोघांविरुद्ध मारवड पोलिसात भादवि कलम ४५२, ३२४, ३२४, ५०४, ५०६, ३४ अन्वये गुन्ह्याची नोंद करण्यात आली असून पुढील तपास सपोनि राहुल फुला यांच्या मार्गदर्शनाखाली पो.ना सचिन निकम करीत आहेत.