अमळनेर (प्रतिनिधी) तालुक्याच्या जानवे जंगलाच्या हद्दीत कवटी हाडे आणि अडीच महिन्यांपूर्वी सुरत येथील हरवलेल्या महिलेचे आधार कार्ड आढळून आले आहे. यामुळे खळबळ उडाली आहे.

  याबाबत अधिक माहिती अशी की,  जानवे जंगलात बकऱ्या चारणाऱ्या गुरख्यांना एक कवटी काही हाडे, वैजंताबेन भगवान भोई (वय ५०, रा. कुबेरनगर कतार गाम दरवाजा सुरत) या महिलेचे आधार कार्ड आढळून आले. त्यांनी अमळनेर पोलीस स्टेशनचे पोलीस निरीक्षक दत्तात्रय निकम याना कळवताच त्यांनी हेडकॉन्स्टेबल कैलास शिंदे सह घटनास्थळी धाव घेतली. जिल्हा पोलिस अधीक्षक महेश्वर रेड्डी यांच्या परवानगीने फॉरेन्सिक पथक बोलावून घेतले. घटनस्थळवरून हाडे, केस, वस्तू व काही नमुने ताब्यात घेऊन त्यांची तपासणी करण्यात येणार आहे. घटनास्थळी अप्पर पोलिस अधीक्षक कविता नेरकर, डीवायएसपी विनायक कोते, पोलिस उपनिरीक्षक भगवान शिरसाठ, पोलिस उपनिरीक्षक नामदेव बोरकर, पोलिस उपनिरीक्षक समाधान गायकवाड, काशिनाथ पाटील, अमोल पाटील, जितेंद्र  निकुंभे ,सागर साळुंखे आदिनीही भेट देऊन पंचनामा केला व आजूबाजूचे नमुने घेतले. दरम्यान वैजताबेन ही १७ मे २०२५ पासून बेपत्ता झाली होती. सुरत येथे बाजारपेठ पोलिस स्टेशनला हरवल्याची नोंद करण्यात आली आहे. तूर्त  अमळनेर पोलिस स्टेशनला अकस्मात मृत्यूची नोंद करण्यात येईल. त्यांनतर तपसाअंती पुढील कारवाई करण्यात येईल, अशी माहिती पोलीस निरीक्षक दत्तात्रय निकम यांनी दिली.