अमळनेर (प्रतिनिधी) एकाच वेळी तीन मोटरसायकलींच्या झालेल्या धडकेत एक मोटरसायकलस्वार जागीच ठार तर तीन जखमी झाल्याची घटना तालुक्यातील देवळी शिवारात अमळनेर चोपडा रस्त्यावर ५ रोजी सायंकाळी साडे सात वाजेच्या सुमारास घडली. याप्रकरणी पोलिसांत नोंद करण्यात आली आहे.
पोलिसांनी दिलेली अधिक माहिती अशी की, प्रकाश रेबान बारेला (वय ३५ रा तासखेडा) हा आपल्या सासूसह मोटरसायकल (क्रमांक एम एच १९ बी ए ७३५६) वरून चोपड्याहून तासखेडा येत असताना श्रमसाफल्य एज्युकेशन सोसायटी जवळ समोरून मोटरसायकल (क्रमांक एम एच १९ ,ए यु ४३१९) आणि अन्य मोटार सायकल (एम एच १९ एल ९७४९) या वेगाने आल्या व एक मोटरसायकलने चुकीच्या बाजूने येऊन धडक दिल्याने प्रकाश बारेला जागीच ठार झाला. तर खियालीबाई नरसिंग पावरा (वय ५५) तसेच इतर दोन मोटर सायकलवरील दोन जण रस्त्यावर जखमी अवस्थेत पडलेले होते. जखमींना १०८ रुग्णवाहिकेने उपचारासाठी रुग्णालयात दाखल करण्यात आले. देवळी येथील पोलीस पाटील अविनाश अशोक बैसाणे यांच्या फिर्यादि वरून अज्ञात चालकविरुद्ध गुन्हा दाखल करण्यात आला असून पोलीस पुढील तपास करीत आहेत.