विद्यार्थ्यांनी सांताक्लॉजची वेशभूषा धारण करून जिंगल बेल गाण्यावर केले नृत्य

अमळनेर (प्रतिनिधी) येथील स्वामी विवेकानंद इंटरनॅशनल स्कूल (सी.बी.एस.ई.) येथे नाताळ सण (ख्रिसमस) उत्साहात साजरा करण्यात आला. यानिमित्ताने विविध कार्यक्रम घेण्यात आले.
पूर्व प्राथमिक व प्राथमिक विभागातील विद्यार्थ्यांनी सांताक्लॉजची वेशभूषा धारण करून जिंगल बेल या गाण्यावर नृत्य सादर केले. त्यानंतर प्राथमिक विभागातील विद्यार्थ्यांनी नाटक सादर करून विद्यार्थ्यांना मोलाचा संदेश दिला. तसेच पूर्व प्राथमिक विभागातील शिक्षिका मदर मेरी, फादर जोसेफ , मेंडपाल, परी असे विविध वेशभूषा धारण करून प्रभू येशूच्या जीवनावर आधारित उत्कृष्ट अशी नाटिका सादर केली. विद्यार्थ्यांना चॉकलेट देऊन “हॅप्पी ख्रिसमस डे “च्या शुभेच्छा दिल्या. शाळेचे मुख्याध्यापक हेमंत कुमार देवरे यांनी नाताळ विषयी व प्रभू येशूचा महिमा याबाबत विद्यार्थ्यांना माहिती दिली. तसेच उपमुख्याध्यापक विनोद अमृतकर यांनीही नाताळ विषयीचे महत्व विद्यार्थ्यांना पटवून दिले. ‘राष्ट्रगान ‘म्हणून कार्यक्रमाची सांगता करण्यात आली .त्यावेळी शाळेतील सर्व शिक्षक वृंद व शिक्षकेतर कर्मचारी उपस्थित होते.